按键盘上方向键 ← 或 → 可快速上下翻页，按键盘上的 Enter 键可回到本书目录页，按键盘上方向键 ↑ 可回到本页顶部！
————未阅读完？加入书签已便下次继续阅读！
莫斯科亦攻打英国！贝南奇希望阻止美国通胀率唔再恶化，同时阻止美国楼价下跌以免引发通缩。你话得唔得？打仗最忌腹背受敌，呢次真系睇贝南奇功夫嘞。根据过去纪录，联储局晌安排软着陆方面大都唔成功，最成功一次只系1994年，呢次又点？油价至今未跌穿六十九美元，金价未低于六百一十美元，唔好咁快以为对付通胀率方面已取得胜利。美国房地产7月份销量较1月份减21％，系2004年11月以嚟最差；7月份新批建造合约减7％，更系四年内最差；美国私人住宅单位超过一亿间，平均每间价值二十五万美元，如回落10％，即美国人共失去二万五千亿美元财富；如回落20％，便更加不得了！
领先经济指标过去六个月连续以年率1。4％速度下降，从呢点睇，美国未来情况不妙。CPI仍保持较高增长率，GDP却保持低增长，即滞胀环境已形成。美国经济环境正重返七十年代情况，当时道指喺1000点水平上落，今天改为道指喺11000点水平上落。香港响七十年代系GDP高增长期，当年香港情况系CPI同GDP同时高速增长；但今时唔同往日，香港经济已完成经济上所谓黄金三十年，1997年8月起步入GDP低增长期，再不能用七十年代情况去分析依家嘅形势。从摆动指数睇，今年除咗5月份出现超买、6月13日超卖外，港股过去两个月超买或超卖情况并唔明显，股市赢家都系嗰D懂得买入强势股、抛售弱势股者。上升股份由一个行业转向另一行业，并非人人跟得上。
七十年代美国出现滞胀，理由系利率一升再升，但CPI升幅更大，客观环境系“负利率”，利率既阻不了CPI增长率进一步上升，但又不致引发美国经济衰退。直到1979年雪茄伏出任联储局主席，将利率一再推高（最高曾高出CPI增长率六厘）杀死高通胀，代价系1982年嘅经济衰退。如今年贝南奇将利率推高至六厘半或以上，必可解决CPI高增长问题，令CPI增长率重返1％至2％水平，代价系明年美国经济出现衰退。贝南奇如维持利率晌五厘二五，未来美国经济将唔生唔死，CPI增长率问题亦无法解决。
油价已跌穿五十天移动平均线，回落到两个月内低价，系咪方向改变？木宰羊（除非六十九美元失守）由于上周五系8月份石油股期权到期日，近日油价回落可能只系一次技术调整。通常油股期权到期前十个交易天，可令油价回落3。9％左右，然后又再上升。油价系咪又由上周五低价回升？
中国首家石油现货交易所8月18日喺上海开业，落址浦东。由上海互联集团、中国石油、中国石化、中海石化工进出口公司、中化国际等共同组成，注册资本一亿零五百万元人民币。
睇淡油价者如Matt Simmons； Ken Deffeyes及Colin Campbell认为，1973年石油危机后，全球资金大量投资勘探石油，呢方面资金支出大升，一直到1982年（共九年，只有1976年例外）。油价自1980年起回落，黄金再度减少投资；七十年代大量勘探、八十年代进入收成期，带嚟油价过去二十年供过于求，最低喺1999年曾见十美元一桶。1983年起勘探石油方面支出大减，系造成二十一世纪另一次石油危机嘅远因；2002年起勘探石油方面投资又再上升，但新发现嘅大部分深入海底一千尺甚至一万尺，都系极难开采，造成今天油价高企。依家大量深海挖钻机晌2008及09年加入服务，可以喺水深八千五百尺之下海底钻探三万五千尺深，估计到时将有大量深海油田被发现，而再次改变未来石油供求关系。
十九世纪石油用作点灯叫做“煤油”，不但生产困难，加上过于易燃（十九世纪芝加哥大火：就系因煤油灯被一只牛踢翻引发）。洛克菲勒发现，喺提炼石油过程中加上高温及高压，便可生产出我地日用嘅汽油，优点系燃点提高，解决咗煤油太易着火嘅最大缺点；用此方法提炼嘅石油，佢叫做“标准石油”（Standard Oil），1870年起大做广告推广呢种新生产方法，令所产煤油可以安全使用，引发全球大量使用安全煤油（即今天嘅汽油）。其后洛克菲勒收购咗美国大部分炼油厂去生产佢嘅“标准石油”，再收购油井供应原料……。可以讲，佢嘅发明（用高温同高压去提炼安全石油）不但令佢发达，亦令石油使用从此普及，由此可见创见嘅重要性。分析界认为未来技术突破在于“煤变油”方面。
有银士资产升值速度加快
瑞士联合银行（UBS）乃全球最大嘅私人银行，8月15日公布第二季纯利升50％，第二季共吸纳客户新资金达二百五十二亿美元（折合一千九百六十五亿港元）或年率12％。另一瑞士大银行瑞信公布喺中东及新加坡业务迅速扩。JP摩根大通、汇丰财富管理、高盛证券等喺欧洲及亚洲区业务亦快速发展，计划未来五年将员工数目增加一倍，去服务嗰D拥有一千万欧罗（一亿港元）或以上嘅客户。美林证券调查所得，过去五年拥有一百万美元或以上财资（唔包括自住物业及退休金）人数上升20％，大部分喺自中国、印度同中东，而且都系创业成功者，而非承继上一代财产者。佢地要求嘅服务较进取，再非投资债券或地产，最大兴趣反而系对冲基金及私人配售方面，甚至衍生工具及外汇买卖。
美亚证券指出，UBS同美林收入三分一税前纯利来自财富管理，其他金融机构喺自财富管理收入亦大幅上升。有银士响财务机构嘅协助下，资产升值速度加快，造成社会进一步分成20/80 （20％人口愈嚟愈富有，80％人口财富唔系停滞不前便是倒退）。
“炒”可以兴家，但不可以致富。唔少人第一桶金皆嚟自“炒”，晌获得第一桶金后，日后财富嚟自如何运用呢桶金。如果仲系炒上炒落，迟早输番晒；反之，利用赚返嚟嘅第一桶金作为资本按年上升，二、三十年后便可发达。
今年5月起股市十分波动，更加证明做功课嘅重要性。投资策略系“少”就要博、“大”就要守。钱少之时不妨炒吓博大生死，一旦银码达某一水平，便应利用长期增长办法，毋须再追求高风险、高回报。投资成功与否在乎你买乜嘢及卖乜嘢，唔在乎你对后市点睇。创业难，守业更难。赚取第一桶金当然困难，如何令财富保持增长就更难，喺今日唔知明日事嘅环境下，一唔小心便可将辛苦赚返嚟嘅财富失去。即使投资中国，过去二十八年改革开放政策下唔少人发达，但亦有大量人因投资中国而失去所有。我地强调高回报率嘅同时，亦必须留意高风险，例如1997年前嘅红筹股，至今有几多只能重返高位？2000年中移动（941）股价系八十元，今天亦只系五十一元七角五仙！1997年8月北京控股（392）股价六十五元，今天系十二元四角二仙，仍跌80！当大部分人睇好某一行业时而入市，事后皆证明睇错。
1997年至今恒生指数已完成大W型走势，上述走势代表一个地区（或国家）经济由灿烂趋于平淡，未来香港股市更难炒。
新加坡股市或有投资价值
呢期《Bank Credit Analyst》发表咗两个有趣图表。一亚洲房地产价格与英国、美国、澳洲、加拿大等英语区房地产价格比较，证明1997年亚洲金融风暴后，亚洲区房地产价格大部分日子落后英语区国家！英语区国家今天楼价可能偏高，但唔代表亚洲区地区同样偏高。英语区国家楼价1995至2000年以年率5％速度上升，2000至05年更变成以年率10％速度上升，主要受2001年起联储局嘅低利率政策影响；虽然2004年6月起利率止跌回升。但楼价仍然上升。去年第四季开始，英语区楼价停止上升，英国及澳洲更略为回落，好大机会已进入调整期，但亚洲区可能例外。
二、2000年至今新加坡股市一直落后亚太区新兴市场。今年5月起亚太区新兴市场开始调整，并唔代表新加坡股市同样受压。今年5月对冲基金开始沽售新兴市场股，其中科技股所受压力最大；另一抛售理由系担心日圆加息及日圆汇价转强。不过，6月份起分析员认为上述担心有D过虑，虽然资金唔再泛滥但仍然充沛，令股市又再反弹；加上8月8日联储局停止加息，新加坡股市系咪有投资价值？
曹仁超
PDF原文：
原序号：285序号：
35
标题：
中国大笨象会跳舞
来源：
信报
发布日期：
2006…08…22
全文：
8月21日，周一。恒生指数回落322。